جيل عالم سمسم

" سوسة سوسة كف عروسة سوسة واللى يسقف يستاهل منى بوســــــــــة "
" توت توت قطر صغتطوط كل مايمشى بيقول توت "
" انا لما بحب اتسلى ماحبش اقزقز لب .. انا عندى اقرا مجلة او ارسم زى مااحب "
والله كانت ايام حلوة اوى ايام طفولتنا دى احلى من طفولة دلوقتى بكتيـــــــــر اوى
احنا جيل اتربى على اغانى شبه دى كتير .. احنا بلا فخر جيل عالم سمسم وكارتون توم جيرى اللى كان بيتعرض يوم الجمعة الصبح فى سينما مترو
دى حاجات فعلا كانت بتحسسنا بسعادة وفرحة كبيرة اوى اللى بقت تختلف عن طفولة الوقت الحالى من تطوراته وقفزاته وادواته التى لاتتوقف ابدا
احنا الجيل اللى كان بيلعب الفيديو جيم ابو حجارة اللى كان فيه لعبتيين بس وباقى اللعب التانية فيه شبههم واحنا جيل الكونوكت فور وبنك الحظ والسمك اللى بالمغنطيس وسوبر ماريو وكابتن ماجد و ........
بس ليه كل الكلام ده والذكريات الحلوة دى اللى الجيل الصغير ضحك علينا لساذجتنا والجيل الاكبر مننا ضحك علينا لبساطة وقتهم اكثر من ذلك فهم جيل السيجة والحجلة ولعب اختفت لانعرف منها سوا اسماءها فقط والجيل الى انتمى له تذكر هذه الاشياء وابتسم
بصراحة انا بقول الكلام ده لانى شايف الجيل االلى طالع جديد دلوقتى متربى على حاجات تانية خالص اللى هما هيكونوا اساس البلد اللى هما 65% منه الان واللى هما بلافخر هيكونوا مستقبل البلد دى فى يوم من الايام لما نكون احنا ماضيها
جيل الاى باد والاى فون اللى بلمسه واحدة عليه تتحرك الدنيا بااكملها من مكالمات وفيديوهات ومعلومات وطباعة ابحاث كنا بنسهر عليها ايام واساابيع علشان نلخصها من المكتبات , والانترنت عنده مفتوح 24 ساعة من موبايل للاب لكمبيوتر مخلاااااااش .... مش احنا اللى اما دخل عندنا النت كان بسلك التليفون اللى كنا منقدرش نشغله اكتر من ساعة علشان منشغلش التليفون كتير
جيل بدل مايسمع اغانى تنمى فيه روح البراءة والطفولة وتخليهم يعيشوا كل مرحلة بحلاوتها بيسمعوا اغانى " هاتى بوسة يابت هاتى قطة يابت " ..... الله يرحم ماكنا بنسمع اغنية انا عندى بغبان نتنطط من الفرحة  :)
جيل من هواياته التسكع على الامم والنواصى للمعاكسة بقى او التحرش حتى او ركوب الموتسيكلات واللف بها فى الشوارع ومن سن 8 سنوات بيركبوها , مش احنا اللى كنا يوم مانأجر عجلة نص ساعة نعمل فرح وكمان سايبيين شباشبنا رهن عند العجلاتى :)
تفتكروا كل الحاجات دى بتأثر فى الجيل ؟ طب ولو بتأثر هتأثر بالايجاب ولا بالسلب ؟؟
طب هيعمل ازمة اخلاق ولادى توقعات وتخمينات مش فى محلها ؟
بس اكيد فى الاخر احب اقولكم ان هو ده الطبيعى وهو ده تطور التكنولوجيا وتطور الاجيال والتكنولوجيا مهمة فى حياتنا وتطورها اكيد بينفعنا لكن المهم نستغلها صح وبالقدر الصح مش مجرد استخدام وخلاص واكيد هيجى واحد يكتب بعد كام سنة من الجيل ده عن الجيل اللى طالع بعده برضوبيتتريق عليه :)