الماء الحى

كل مرة كنت اطلع فيها رحلة سواء مع المدرسة او الكنيسة كنت طبعا باخد ازايز مية معايا علشان معطشش فى الرحلة , بس كانت للاسف بتخلص من نص الرحلة ده لو مخلصتش قبل كدة واحتاسنا بقية اليوم هانعمل ايه فى المية اللى خلصت دى وساعتها كنت باقول لنفسى ياسلام لو كان معانا المية اللى ربنا قال عليها للسامرية اللى مبتخليش حد يعطش تانى ابدا , وفضلت مدة فاكران ربنا كان قصده مية فعلا زى اللى بنشربها لحد مافهمت انها حاجة احسن واقوى من كدة بكتيير وهى كلام ربنا لينا .......
ربنا شبه كلامه بالمية لانه عايزنا نشرب كلامه فيدخل جوانا ويعمل فينا ويكون جزء من حياتنا , ده حتى كان فى مقولة بتقول " كل اناء ينضح بما فيه " فلازم يكون داخلنا حلو علشان الناس تحب اللى غيرنا كدة .... فياترى احنا جوانا مية حلوة ولا نص نص ولا وحشة ولا مش جوانا مية اصلا ؟ !
 السامرية لما جت تاخد المية اللى فى البير وهى خايفة من ان حد يشوفها لانها خاطية وعلشان كدة جت للبير الساعة السادسة اللى مكنش حد يقدر ينزل فى الوقت ده ساعتها لصعوبة الطريق مع حرارة الشمس العالية هناك , لكن لما قابلت ربنا وطلب منها مية مع انه هو اللى بيروى جميع المحتاجين والعطشانيين اليه , فسئلته انت معاك جردل تملاه ياسيد ؟ لكن ده طبعا بسبب تفكيرها المحدود اللى فاكرة بيه ان ربنا محتاج لجردل واحد يملاه ومتعرفش ان ربنا اختار كل واحد فينا علشان يكون هو الاناء المختار بتاعه وهيكون هو ده الماء الحى اللى بسببه مش هيعطش تانى ابدا . ده كمان من حلاوة ربنا انه قرر يدينا الفرصة  اننا نملاه من الماء الحى وكمان ببلاش من غير مانمشى ولا خطوة واحدة من اللى مشيتها السامربة دى 
لكن كل ده برضو السامرية مش فاهماه وبتقوله هتدينى مية ازاى هو انت اعظم من يعقوب صاحب البئر ؟ ومتعرفش انه هو اله يعقوب نفسه , لكن هنا ربنا من حلاوته وحنانه وانه مش عايز واحد بس ميعرفهوش اعترفلها بانه المسيح فعلا , ودى كانت من المرات القليلة اللى المسيح اعترف بيها بنفسه فى الانجيل 
هنا اتغييرت السامرية وربنا فتح قلبها وعنيها عليه فاعترفت بخطاياها قدامه وتابت عنها وكمان نزلت للمدينة بشرت بيه وكأنها بتقول للناس تعالوا كلكم اشربوا زى مانا شربت علشان متعطشوش ابدا فانا كنت خاطية وهناك يسوع قالى على كل خطاياى  ورجعتله تانى مع ناس كتير جدا من المدينة بسببها
احنا بقى روحنا للبير اللى ربنا جابوا لحد عندنا واعتقد موجود فى كل بيت وهو " الكتاب المقدس " ولا لسه ؟
 ولو روحنا شربنا ولا مشرنباش ؟ ولو شربنا بيبان قدام الناس اننا شاربين مية فعلا علشان يمجدوا ابينا الذى فى السموات ولا .... ؟
  وقولنا للناس تشرب زيينا زى ماالسامرية عملت ولا لأ ؟