المثل الأعلى

قبل ماادخل فى تفاصيل ونوجع دماغ بعض فيها
انت مقتنع انك مثل اعلى لحد ؟ ولا لا
مقتنع يبقى حمد الله ممكن اقولك على اقتراح جديد , مش مقتنع يبقى تعالى سوا ناخد الفكرة من اولها
بص ياسيدى انت مش ليك مثل اعلى ؟ ...... اكيد ليك
كل انسان صريح مع نفسه هيعترف ان ليه مثل اعلى سواء مثل اعلى فى الشغل او فى الحياة او فى القيم او فى التدين او فى الاخلاق او التعامل مع الناس او الكدب حتى او حتى فى الصياعة
اه صدقنى
كلنا لينا مثل اعلى لان ربنا خالقنا " ناقصيين " مش كامليين فكل واحد مننا بيدوور على النقطة الضعيفة عنده اللى بيحتاج يبرزها وينميها او النقطة القوية اللى بيشوفها تحقق طموحاته وتسعده فبيلاقيها فى واحد تانى ظاهرة عنده اكتر منه او حد عرف ينميها او يستفاد منها
لكن المشكلة دلوقتى ان الجيل الجديد بقى كتير منه ملوش مثل اعلى او مش عايز يبقى ليه مثل اعلى 
بس لأ هو مش عارف مين هو المثل الاعلى .. فاحنا بطلنا نفكر فى الموضوع ده , مين فينا مثله الاعلى زويل ولا نجيب محفوظ ولا العقاد اللى مكملش تعليمه ازاى بقى كاتب ومفكر بالحجم ده . مين فينا حاطط قدامه محمد على باشا اللى اسس مصر الحديثة ولا نبوية موسى او قاسم امين او العالم مصطفى مشرفة اللى الناس يمكن مش شايفاهم مثل اعلى بس ده فى ناس متعرفهمش اصلا وغيرهم كتيير.
لكن ياسلام بقى لو نيجى نشوف المثل الاعلى اللى عايزيين نبقى زيه فعلا من دينا الرقاصة ل مهند ونور وابو تريكة او ابراهيم الابيض , ........ الخ , حاجات غريبة فعلا وامثلة متناقضة للاسف , انا مبكرهش الناس دول صحيح لكن محتاجيين يبقى لينا مثل اعلى اعظم من كدة نحطه قدام عينينا يمكن نبقى زييه او حتى نصه فى يوممن الايام
فحاول تختار مثل اعلى ليك كويس حاطه قدام عينيك دايما يعليك عشان تعلى زييه .
بالمثل برضو انت كمان فيك حاجة زيادة مش عند حد تانى وانت ممكن جدا تكون مش مكتشفها لانها من ضمن حاجات كتير عندك .
 لكن خلى بالك الحد ده هتكون دايما عينه عليك متابعك ومراقبك , شايف نجاحاتك وراصد لتحركاتك العملية او مراقب لأى تصرف يجعله متحفز للوصول للنقطة الذى يراها هذه .
حاول كل حاجة تعملها كويسة ومتفتكرش نفسك ولا حاجة ولا شخص مش مهم عشان خاطر العين دى اللى نفسها تقلدك وعايزة تبقى زييك ليه متكونش انت جميل فى صفاتك, محب لكل الناس , خدوم للاخرين , مشع بالتفاؤل , ناصف للضعيف , ......... صفات تانية كتيير.