الجواز مشروع اجتماعى ناجح مش فاشل

ناس كتير نفسها تتجوز ولكن برضو فى ناس مش قليلة مبتفكرش فى الموضوع اصلا طب ليه ؟
هو الجواز ده مشروع اجتماعى فاشل ولا ناجح ؟

ليه الناس خايفة منه وليه شوية منهم مبينجحهوش فيه ؟
على فكرة الجواز مشروع اجتماعى جميل جدا احنا كمان ممكن نسميه مشروع اسرة جديدة , حاجة حلوة حلوة يعنى مش هزار. لكن طبعا المشاكل بتحصل لاسباب كتيرة ممكن اجتهد واحاول اقول اللى انا حاسه مع انى معنديش خبرة المتجوزيين ومدونة متنفعش فيها دى محتاجة كتاب بحاله
فى البداية بنات كتير وعائلتها بيدوروا على الشاب المترييش ابو شغلة كويسة وابو عربية وشقة فى مكان كويس وطبعا لو مسافر برة فى الخليج ولا اوروبا يبقى خلاص كدة مقبول من غير مقدمات 
وولاد كتير يااما يكونوا متريشيين فأهاليهم تجوزهم ناس وفقا لمصالحهم هما ولتنمية مصالحهم دى يااما يدوروا على البنات المنظر الى تديهم برستيج قدام الناس شكل وجمال وستايل والى اخره
نيجى لفترة الخطوبة بقى وبتبقى كلها لمعظم الناس فسح وكلام حلو وشقة ونقاش وسيراميك وفرش وملاهى ومتاهة عالاخر
وبعديها يتجوزوا ويبدا شهر العسل اجازة حلوة كدة كام يوم ولا كام اسبوع عسل ولا عشان نكون متفائلين كام شهرولا سنة  وبعديها تبدأ المشاكل
 تاراراراااااا 
الراجل يبطل كلام حلو ورومانسية والبنت بطلت تكون حلوة ومهتمة بنفسها او مشغولة بالعيال لو كان فى عيال او الراجل مطحون فى الشغل عشان يكفى المصاريف والزوجة مطحونة فى الشغل واكل البيت والذى منه او ممكن على النقيض برضو الراجل مش مهتم بحاجة غير صحابه وقعدة القهوة والبنت مش مهتمة غير بالكوافير والشوبينج مع صحابها
وبعد كدة نقول اصله طلع عصبى وهى طلعت نكدية وهو مش عايز يشيل مسئولية وهى تغرق فى شبر مية و ........ الخ
لكن فى الحقيقة ان محدش لحق يفهم التانى انشغلوا بكل الحاجات التانية الصغيرة والمنظرة ونسيوا يعرفوا بعض ويفهموا بعض
الجواز ده هو ان الراجل داخل على حياة جديدة بعاداته وهوياته القديمة الى حياة جديدة ولان الست نفس الحكاية فالمفروض يقربوا وجهات النظر بينهم وبين بعض ويركنوا الانانية على جنب وكل واحد يكون مستعد عن التنازل عن عاداته وهوايته علشان يقدروا يعيشوا حياة جديدة سعيدة حلوة متعاونيين مع بعض
ليه الراجل يبطل الكلام الحلو والتشجيع ويبقى كل قاموسه اللغوى نقض وكلام زى السم , اصلك تخنتى وعجلتى واكلك وحش والله يرحم اكل امى وكتير اوى من كدة ولا بيعاملها انها الجارية تعمله الشاى يشرب ويرمى الكوباية وهى تغسل وراه " مفهاش حاجة يااخى اما تتعاون معاها على الاقل فى حاجتك ماهى بنى ادمة برضو مش جارية "
وليه البنت دايما بتعتبر الراجل ان هو الشوال اللى فيه الفلوس يصرف وبس وكل شوية تحكيله عن بنت خالتها اللى جوزها جابلها عربية ولا على فستان السهرة بتاع جارتها ولا ليه مش رياضى زى احمد السقا او ليه مش بيخرجها دون النظر لاى اعتبارات ارهاق ولا شغل ولا غيره
ياريت كل واحد يكون داخل على الحياة الجديدة دى يكون على استعداد للتغير والتنازل عن بعض هواياته وعاداته والكلام للطرفين
مش عايزين نعيش حياة زوجية تكون مستمرة فقط لغرض الحفاظ على الاطفال او عشان البرستيج متبقاش مطلقة او لان دينهم مفوش طلاق او اى سبب تانى غير انهم فعلا سعداء .