حمراااااا

احب قبل اما ابدأ اوضح ان حمرا دى مش زى مابيجى فى دماغ الناس او انها مصطلح وحش لا سمح الله لكن ده مصطلح حبيت استخدمه لاعتراضى على تدخل الناس فى حياتنا , ولسبب تانى انهم بيفهموا اللى هما عايزيين يفهموه مش اللى احنا بنعمله فعلا .
يعنى اللى مش عاجبه كلمة " حمرا " يمشيها " خليك فى حالك "
ليه دايما احنا بنحط اعتبار للناس مع ان ده اكييد حاجة بتضايقنا او بتقييد حريتنا 
" انت حر فيما لاتضر "
بدل انت لا هتضر نفسك ولا هتضر غيرك ومؤمن بالتصرف ده اللى بتعمله ووازنه بحكمة وحلاوته لو حاجة مجنونة مش تقليدية ,  يبقى لازم تعمله لان هو ده هيكون جزء كبير فى احساسك بكيانك وبااستقلالك وبسعادتك .
فاانت انسان طبيعى جدا انك تفكر بطريقة غير اى انسان اخر فليك فكر وليك هدف وليك سبب وليك وسيلة فاانطلق يامعلم .
لو انت حابب تلبس شورت واللى حواليك بيقولولك عيب قولهم حمرا 
لو انت مبسوط لانك بتلعب كورة ولا ليه بتلعب شطرنج ومش بتلعب wi او بترسم او بتعزف الة موسيقية معينية واللى حواليك مش عاجبهم لانك كبرت قولوهم .. حمرا
لو انت بتبقى فى قمة سعادتك وانت بتتفرج على توم وجيرى ولا بطوط ولا حتى بتقرا ميكى جيب وعم دهب واللى حواليك مستعيلينك قولوهم .. حمرا
لو انت فرحان ومزقطط ونفسك تعبر عن ده بصوت عالى او تضحك او ترقصلك عشرة بلدى ببدلتك ووقارك فى فرح لانك فرحان فعلا مش بتمثل ولا حتى تعيط ومكسوف لان الناس مستغربينك قولوهم .. حمرا

لو انت بترتاح اما تقعد مع نفسك او مع عواجيز واللى حواليك شايفينك منعزل قولوهم .. حمرا
لوبتحب تجيب شعرك على جنب وتلبس كلاسيك وترفع البنطلون لحد صدرك والناس بيقولوا عليك موضة قديمة وشاب مش رووش ولا ليه بتسمع فريد وعبد الوهاب ومش بتسمع تمورة و حماقى قولوهم .. حمرا
لو انت بتحب القراية وبتقرا كتيير واللى حواليك شايفينك عايش الدور عليهم وعايش سن مش سنك برضو قولوهم .. حمرا
لو انت مش بتحب ترغى فى التليفون مع حد علشان انت شايف ان فى حاجات اهم المفروض تتعمل والناس هاتقول عليك مش اجتماعى ولا حتى بخيل بتوفر تمن المكالمة قولوهم .. حمرا
وفيها ايه لو البنت نفسها تلبس سلوبيت ولا تعمل شعرها ضفايروالناس بيقولولها كخ انتى مش صغيرة ؟!
وفيها ايه لو تروح الشغل ولا الكلية بعجلة او موتوسوكيبل بدل انت كدة تكون مبسوط ودى حتى مستخدمة فى كل دول العالم اللى بتفهم

فيها ايه انك تتفرج على ناشيونال جيوغرفايك او افلام اجنبى معقدة بدل بتديلك فكر جديد وبتفتح مخك على حاجات كتيير اوى انت مكنتش تتخيل تعرفها اوالناس بتقول عليك مكلكع عشان مش بتتفرج عاللمبى او مش رومانسى عشان مبتتفرجش على مسلسلات تركى
 فيها ايه انك طيب وبتحب تعمل الخير مع كل الناس وانت عارف انهم بيقولوا ان الطيبة دى بقت عبط فى الزمن ده
فيها ايه لو تقعد فى قهوة بلدى درجة عاشرة من اللى بتعمل شاى بنص جنيه بدل انت مبسوط كدة عشان بتقرب من ناس وطبقات هتحسسك الف مرة انك فى نعمة وهتديك خبرة حياة انت عمرك ماسمعت عنها مع ان الناس هاتقول عليك بيئة ومش ستايل
ليه تيجى على نفسك وتحرق فى اعصابك وتكلم حد انت قرفان منه لمجرد مصلحة او حد جابرك تعامله  كدة
فيها ايه لو البنت اكلت غزل البنات ولا حمص الشام  فى الشارع تبقى اجرمت ؟؟
مفيش حاجة فرض علينا احنا اللى بنعمل العادة مش العادة اللى بتعملنا ومش زنبنا ابدا اننا اتوجدنا فى مجتمع نمام كل هوايته انه يتكلم على الخلق ويتتريق عليه مع انه مليان عادات تانية برضو تضحك ناس غيرها عليه
طول مااحنا بنتفرج على بعض عشان مستنيين لبعض الغلطة عشان نتتريق ونضحك عليها عمرنا ماهنعيش حياتنا سعداء ومبسوطيين 
الحياة حلوة بس للى يفهمها ... الحياة حلوة مااحلى ايامها
عيشها بحلاوتها وعبر عن طاقتك وكل فرح جواك ومتنساش انك لا بتضر نفسك وولا بتضر غيرك