المحروسة مغلقة من العاشرة مساءْ

كنت قاعد انهاردة بضرب الشاى ابو نعناع فى القهوة التجارية عالبحر وكالعادة اخترت مكان جنب واحد عجوز قاعد لواحد بيسلى نفسه بشد الانفاس على اساس انى انكشه فى اى حديث والسلام اكيد ياهستفاد ياهتسلى
وقد كان
كلمة من هنا على كلمة من هناك نكشته فى موضوع غلق المحلات الساعة عشرة اللى عايزيين يطبقوها فى مصر
فبيقولى انتوا يابنى ومتزعلش منى جيلكم ده بيحب الصرمحة وملوش فى الشغل فيها ايه لو قفلوا كله من الساعة 10 ولا بالكتير  12 
عالاقل تروحوا الشغل فايقيين , قولتله طبعا ياحج على اساس انك فاكر ان الأغلبية هى اللى بتشتغل مش الفئة العاطلة , عمل نفسه مش سامع
قولتله بص ياحج الصراحة قرار كويس لكن توقيته مش كويس وكمان الهدف منه زى مابيتقال كلام هجس راح قالى ليه
قولتله
 اولآ: بيقولوا ان القرار ده معمول لتوفير الطاقة بالرغم من كل كشافات النور بتبقى منوورة الصبح عالطريق اكتر من مابتنور بالليل كمان وانا بنفسى مصورها فى اكتر من مكان بالموبايل 
ثانيا : هتحل ازمة المرور ازاى وهى هتخلى التكدس كله من الصبح لحد الساعة 10 يعنى هتقلل عدد ساعات اليوم الفعلية
ثالثا ورابعا وخامسا بقى ودول الاهم
اما تقفل محلات الساعة 10 وقهاوى الساعة 12 ناس كتير من اللى بيتلموا عالقهاوى هيتلموا عالنواصى اللى يعاكس واللى يشاكل فى خلق الله غير ان الشوارع هتكون ضلمة والآمن طبعا زى ماحضرتك شايف مفيش اصلا , وهيكون فى صيدليات فاتحة 24 ساعة فرصة السطو عليها اكبر.وبما ان المنشأت السياحية هتشتغل 24 ساعة فده هيخلى ناس كتيير تطلع تصاريح منشأت سياحية بالرشوة والشاى ابو ياسميين عندنا مفيش اكتر منه فى البلد ده غير ياحجيجة ان اما المحلات تقفل بدرى كدة الناس اللى شغالة وردية بالليل هتتلغى خالص واللى شغال وردية بعد الضهر هيقعد فى البيت لان صاحب العمل ممكن يقوم هو باليوم كله او بنص العمالة على الأكثرويوفر من العمالة اللى عنده لانه بدل ماكان هيقفل 2 او 3 بقى هيقفل 10
 ونسبة السرقات هتزيد لانها مقترنة بنسبة البطالة اللى هى اصلا عندها مش عارفين نلاقيلها حل , قالى لا مامرسى هيوفر بديل لكل ده .. قولتله مرسى مين ياحج انت مسمعتش عن انجازاته فى ال100 يوم ولا ايه قالى لا لسه قولتله الله ينووووووور عليك اهوهايحل كل المشاكل اللى قولتلك عليها دى وهاتبقى زى مشروع النهضة بالظبط 
وخلى بالك انا مع القانون فعلآ لانه هينقلنا من مرحلة الانتخة والبلادة اللى احنا فيها لمجتمع عامل ومنتج زى الدول المنتجة اللى طبعا احنا بنسمع عنهم وعن تقدمهم ومش عارفيين السبب لكن مينفعش يتطبق فى المرحلة اللى احنا فيها دى على اقل تقدير من وجهة نظرى المحلات اللى تشتغل بعد المواعيد دى يدفعوها ضريبة اعلى من اللى شغال فى المواعيد الرسمية ويفعلوا الامن بشكل اقوى من كدة مائة مرة ويبقى عندهم القدرة على تفعيل قرارتهم
والحمد الله حجيجة اتبسط من كلامى على غير العادة لمن سبقوه وقالى انت من هنا ورايح صديقى