فوووووق ياعم الحاج

مش هاقولك انزل ولا ماتنزلش , عايز تنزل انزل ولو مش عايز فمتنزلش 
اصل مفيش حد هيحافظ على ادميتك ومصريتك وانسانيتك غيرك وهافكرك بس بشوية حاجة ظاهرة جدا وما خفى كان اعظم 100 مرة  
شايف عندك ايه حلو ؟ وايه كويس ؟ 
بلاش السؤال ده شايف عندك ايه هاااااايبقى كويس ؟ او ايه الخطة ؟ او المشروع اللى شغالين فيه طبعا غير مشروع النهضة اللى طلع مشروع الكنافة الشعر اجدع منه  ولا اقولك كمان بلااااااش السؤال ده .
فين انجازات مرسى ؟ فين ال100 يوم ؟ ايه المتوقع من اللى انت شايفه دلوقتى ولو مش شايف بقى مش هاينفع اسيبك كدة من غير ماافكرك بشوية حاجات بسيطة وارجوك متضايقش منى او تكتئب بسببى
عندك نوراللى اد ارتكبت جرايم بسببه طب مياة اللى احنا اكبر دولة على حوض النيل هايقفلوها علينا وعلاقات بين الدول بقيت عالحديدة , عندك اثيوبيا والامارات بقوا بيسفروا عمالتنا هناك والاتحاد الاوروبى حطنا بلاك ليست لاننا دولة بترعى الارهاب ,عندك امن تعرف تنزل بنتك او اختك او امك او مراتك الشارع طب تعرف انت نفسك تحمى نفسك فى الشارع ... دى الظباط نفسهم بيخافوا ياجدع وجنود الجيش بتتخطف ومش عارفين نمسكلهم جناه شايف سياحة ؟؟؟ اللى الاقصر لوحدها فى تلت اثار العالم كله !!!!! والمفروض تأكلنا الشهد وحطولها محافظ راعى الارهاب فى المنطقة طب فين سينا ؟ ولادك لاقيين شغل ؟ لاقيين فلوس عارف تأكل ولادك عيش ولا مبتقدرش تقف فى طابوره .. عندك بوتجاز ولا المستودعات بتطلعه سوق سودا ب 20 جنيه واكترولو جالك بيطلعلك كل دور بسعر خاص .. عندك تعليم ولا شايفهم سنة يخلوا الثانوية العامة سنة ومرة اتنين , شايف مستشفيات ولا كله بيقول يلا نفسى وحضانات بتموت العيال اللى فيها من قلة الكهربا ومصانع بتبوظ اللحوم اللى فيها من قلتها برضوومع علم حضرتك انت بتاكلها لأن المصانع مش هترضى بالخساير دى ومفيش رقابة هاتقول لأ اعدمى البايظ .. عندك استيراد زى زمان ولا الشغل واقف لان يأما خايف تجيب بضاعة عشان وضع البلد مش مستقر ياأما خايف تجيبها ومتعرفش تحمى مخازنك ويستولوا عليها البلطجية ولا عشان الدولار طلع لحد 8 جنيه الا حاجات بسيطة لاول مرة فى حياته , لا اسف مش الدولار اللى طلع ده الجنيه اللى نزل وبمناسبة الجنيه والاقتصاد شايف البورصة مراية الاقتصاد ازاى ؟؟ كل يوم بتخسر بالمليارات ؟؟؟ طب اخدت بالك من الاعلانات الكتيرة اللى مغرقة التلفزيون اللى كلها عن ادوية وعلاجات ومنشطات غير معلومة المصدر وياماكتر الغلابة فى بلدنا اللى عايزيين ياخدوا اى حاجة تخففهم والسلام من غير مايروحوا لدكتور من غير مايدفعوا فوزيتا , عاجبك حال المحاكم وان محدش عارف ينفذ حكم على التانى لانها بقيت بلطجية والبلطجى يجيبلك حقك اسرع من المحاكم بكتيير , عاجبك كترة السلاح اللى بقى مع العيال الصغيرة واد ايه ده خطر بيهدد ناس كتير , عاجبك الرصفان اللى احتلوها البياعيين جبرا وغصب عنك انت واللى يتشددلك كمان , هاقولك ايه ولا ايه مانت شايف كل حاجة بنفسك بس انت بتقول كبر دماغك واما نشوف هاترسى على ايه 
مانت واخوك وصاحبك وصاحبه خايفيين على نفسكوا وعلى عيالكوا ومحدش عايز ينزل حد , طب فين الثورة ياجدعان مين اللى هايغيير ؟ ولا احنا مستنيين الدنيا تغير نفسها بنفسها او الاخوان يصجى ضميرهم فجأة فى سابقة لهم من 82 سنة ويقولوا احنا كدة ياجماعة خربنا البلد وحرام علينا مصر واللى عملناه فيها 
وعلى فكرة معظم اللى بيحصل ده كان بيحصل زمان بس مش كلنا حاسين بيه لكن دلوقتى العالم كله حاسس بينا وعلشان كدة عملنا الثورة عليه والناس كلها عارفة اننا بقينا خلاص على حافة الهاوية وصراعات وفتن وحروب اهلية داخلين فيها 
فى الاخر تنزل ولا متنزلش , تعارض او متعارضش انا مليش دعوة بيك