مصدق بالوعد ولا لساك شكاك ؟!

Promise دى كلمة انجليزية معناها وعد

على طول بنستخدمها مع صحابنا لما نحب نأكد حاجة او بنطلب حاجة مهمة من صحابنا فنقول لبعض الكلمة دى وكانها هى الكلمة اللى بتدينا الامان والثقة ان فعلا هتحصل الحاجة دى

بس ياما برضو الكلمة دى زعلتنا من بعض لاننا مش دايما بنعرف ننفذ وعودنا لاننا بشر

ايه الكلام ده طب مانسينا من الوعود الارضية دى ونتكلم مع بعض عن وعد اعظم علشان نقعد مع اله اعظم  واللى استحالة ابدا يخلف الوعد بتاعه

يسوع المسيح وعدنا وعد مهم اوى اننا نصدقه فى حياتنا واذا كان احنا بنصدق وعود الناس اللى عالارض يبقى ازاى مش هنصدق وعد اله السموات والارض

ربنا وعدنا بالحياة الابدية واحنا واثقين انه هايتنفذ فهو تمم عملية الفداء كلها من اولها لاخرها من ساعة مااتجسد لحد الصلب والقيامة علشان يأكد علينا الوعد ده اللى اتعذب علشانه كتير علشاننا احنا اللى وعدهولنا كتير اوى فى انجيله سواء عهد قديم فى المزامير او اسفار العهد القديم او فى الجديد فى رسايل بولس الرسول او معظم انجيل يوحنا اللى قالنا وطمننا بكل صراحة ان فى حياة ابدية لكل من يؤمن به

واكيد انت عارف ان كلام ربنا غير قابل للشك ابدا وهايتنفذ هايتنفذ واكيد انت اخبرته قبل كدة كتير ولمست ايد ربنا فى حاجت كتير برضو

لكن الاهم بقى احنا فعلا مصدقيين بجد ومقدريين ربنا عمل ايه علشان لا يهلك كل من يؤمن به ؟؟

احنا فعلا مصدقيين ان ربنا صعد الى السموات علشان يجهز لكل واحد فينا كرسى باسمه فى السما واول مايخلص تجهيزاته وتزيين كراسيينا ويحط اسامينا فى سفر الحياة معاه , داحنا لو نطول نخطف كراسينا دى خطف زى اللص اليمين اللى تاب على اخر لحظة وربنا وعده بالفردوس .. ولا لسه شكاكين زى توما الشكاك اللى مكنش مصدق ان ربنا هاينتصر على الموت زى ماكان واعدهم قبل الصلب بس من حنية ربنا انه ظهرله ووراله مكان المسامير فى ايديه اللى بسببه ربنا ادانا تطويبة هدية لاننا أمنا ولم نرى ..... انت امنت ولم ترى فعلا ؟؟

ادينا يارب الايمان القوى اننا نصدق فى وعودك ونحاول نرضيك يارب على قد مانقدر علشان ناخد اماكننا اللى محضرهالنا يارب ودفعتها تمنها غالى اوى من دمك الثمين

انا مصدق .... انت كمان مصدق ولا لساك شكاك ؟!