عيد ميلاد يسوع

لو عيد ميلاد حد متعرفهوش اوى بس انت معزوم عليه ... هتروح وهتبقى فرحان كمان وسعيد بالشخص ده وهتهييص معاهم وابتسامتك هتملى المكان لان الفرحة "عدوة " ولو عيد ميلاد حد بتحبه اوى اوى او حد من صحابك القريبيين هتروح طبعا وهتبقى طايرمن الفرح ومش هتكون عارف تعمله ايه ولا ايه 
طيب وعيد ميلاد ربنا ؟؟
اللى نزل من عرش السموات وساب كل الملك بتاعه وكل جيوشه من الملايكة اللى بتسبح له ليل ونهار ونزل وأتولد زييينا على الارض علشان يبدأ رحلة الفداء علشاننا احنا ميستحقش اننا نفرح معاه !! ونهييص ونحتفل بيه كمان ونفرح ونفرح كل للى حوالينا معانا بعيد ميلاد يسوع ونعرف كل الناس ان يسوع نزل الارض واتولد فى اليوم ده علشان يشيل عنا خطيتنا علشان يرميها فى بحر النسيان ونركع قدامه ونقوله احنا بنحبك ياربى وعيد ميلادك ده هو سر خلاصنا وسر فرحتنا على الارض .
انت اختارت مزود بقر علشان تنزل تتولد فيه وتعلمنا التواضع , لكن انا كمان يارب محتاجلك تيجى وتتولد جوه قلبى انا فاتحلك الباب زى مااهل المزود فتحولك والهدية للى جاى اقدمهالك وانا متأكد انها هاتعجبك هى المحبة , بقدملك محبة زى ماطلبت منى وهاحب يارب اخواتى فى السنة الجديدة وكمان اعدائى هحبهم زى ماقولتلى فى الوصية وهابدأ بأنى احكى عنك لكل الناس علشان اللى معرفكش يعرفك واللى متلمسش منك يارب تلمسه علشان الكل يعرفك فى السنة الجديدة ياخد من بركتك وشفائك وحتى اللى مش عارفك كمان افتكره فى عيد ميلادك عشان يحتفل بيه معانا ومتفوتش فرحة الميلاد الجديد منه 
زى مانت يارب ارتضيت تتولد فى مزود البقر بالرغم من كل الحيوانات والروايح والكراكيب اللى جواه تعال يارب جوه قلبى انا فاتحلك الباب ومستنيك تدخل ومتطلعش منه تانى ابدا