تلت ساعة مظاهرة

صدفة سعيدة جدا لم اتوقعها فى حياتى او حتى احلم بيها فى يوم من الايام

معرفش ليه انا كنت سايب دقنى طويلة فى الفترة اللى فاتت ومش عايز احلقها , ممكن كسل او عامل نفسى ستايل او جايز اكتئاب واحتمال برضو قلة نضافة , لكن المهم انى كنت مربيها فترة حلوة كدة لدرجة ان اللى كان يشوفنى فى الشارع يقولى سلاموا عليكم ياشيخ او اللى كان فاكرنى اخوانى ويبصلى بااحتقاركدة . بس برضو مكنتش اتخيل ان هايجى عليا اليوم وانزل فى مظاهرات الاخوان اللى عاملينها علشان يرجعوا اسمه ايه ده .... مرسى للحكم تانى او بمعنى اصح للخلافة .
بدأت الحكاية يوم الجمعة بعد الصلاة وسمعت ان فيه مسيرة ضخمة لتأييد مرسى هتطلع بعد الصلاة وطلعت بصيت من شباك بيتنا لقيت شوية ناس جايين من بعييد روحت قولت دى فرصة انطلاقى بقى انزل واهتف حاكم انا هتيف على قديمو بس متظاهرين سيدى جابر مكنوش مديينى فرصتى كويس
عيشت معاهم مغامرة لذيذة جدا وكانت تغيير برضوحلو فى يوم اجازتى , طبعا محدش اخد باله انى مش زييهم حمد الله كانوا ممكن يقيموا عليا الحد ساعتها وده على احسن التقديرات طبعا مش هوضح اكتر من كدة بقى علشان لو فيه اندر ايدج بيقرا معانا  ولقيت الاعداد قليلة اوى مش زى مابيدعوا حوالى 70 راجل منهم واحد بميكرفون فوق عربية نقل  بيهتف عشان يحمس اللى حوالية ورافع صورة كبيرة للخليفة مرسى العياط وواحد شايل بتاع 20 علم علشان اللى ينضملهم يدولوا علم وحوالى 60 سيدة منقبات وبحجاب شرعى ولابسين على دماغهم طواقى تبرد عليهم حرارة الشمس الملعونة الساعة 12 ظهرا فى عز الصيف ومنهم سيدات شايليين عيالهم سنتيين وتلاتة واربعة ملهومش اى ذنب فى الصراعات السياسية اللى جابتهم للمكان ده الا ان اهلهم عايزيين كدة يمكن عشان كلهم يدخلوا الجنة سوا وملبسينهم شارات على صدورهم مكتوب عليها " شهيد تحت الطلب فداك يااسلام " واخد بالك انت فداك يااسلام مش مرسى خالص هنا ومشييت بينا المسيرة ويقولوا هتافات المفروض نقول وراه احنا كمان.... ايه الهتافات دى بقى " حسبى الله ونعم الوكيل .. ليس للاسلام بديل " , " هى تكية ولا ايه , عسكر يحكم تانى ليه " وشعار لطيف تانى قالوه برضو " اصحى يامسلم اوعى تنام , بدأوا الحرب على الاسلام " ....... شوفتوا بذمتكم الشعارات دى ؟!! علاقتها ايه بحكم مرسى ؟!! غير انها اثارة للناس اللى معاهم على انها حرب دينية او فيها اساءة للدين الكريم , ازاى الناس دى بتربط اسم حاكم بالدين وبتحط الصراعات السياسية دى مع الدين !! , انا كنت فاكرهم نازلين المظاهرات اساسا علشان ولعياذ بالله شايفيين مرسى ناجح وعايزيين يرجعوه او كان معيش البلد فى نمو ورخاء مش زى مالوحشين بتوع التحرير وغيره كانوا شايفنها سواد , طب افرض انا يااخى مسيحى  وعاجبنى مرسى ونزلت المظاهرة هاقول ايه معاكم ؟؟ .. انا متهيئلى لو قولتلكم ايه اللى مرسى عملوا كويس السنة دى هتقولى رئيس جه بالصندوق او انه رئيس ملتحى وبدقن !... طب لو سئلتك سؤال محرج بقى وقولتلك هو عمل ايه لنصره دينه او ايه المشروع الاسلامى اللى ضحك عليكم بيه ؟؟ ... مش هاترد لانه لاهيزييد للدين ولا هيقل منه حاجة اصلا لان الدين اسمى بكتير من الاشخاص , ده غير الهتاف الغريب بتاع حكم العسكر لانهم تقريبا مش عارفين ان اللى بيحكم رئيس المحكمة الدستورية المدنى
المهم كملت فى المسيرة من غير ماافتح بقى بااى كلمة فاانا متفرج مندهش من كل شعارتهم الغريبة دى وحتى الناس اللى كانوا ماشيين معانا .. اللى بيتكلم فى التليفون واللى بيضحك واللى ماشى لحد مايوصل بيته وهكذا .......
محدش فيهم فاهم هو نازل ليه يااما جايز يكون حد وعدهم بالجنة !!
مكملناش تلت ساعة مشى والحمد اله حصل اشتباك وللعلم وعشان امانتى وعدم انحيازى لبتوع التحرير الاشتباك بدأ من الطرف التانى كان راجل حوالى 60 سنة صرخ فى وشهم وقالهم كفاية كلام بااسم الدين بقى حرام عليكم وحرام تمسكوا علم مصر فى ايديكم وقالهم على جثتى علم مصر وشد العلم من واحد وكان عايز يلم الباقى كمان وشتمهم كدة كام لفظ كانوا على لسانى بس مقدرتش اقول حاجة منهم , وهما ولا نطقوا لان ببساطة معندهمش حجة ولا منطق ولا حتى اى كلام عقلانى يتقال المهم الراجل ده شجع الناس ولقينالك يامحترم سيدات مصر الجدعان من البلكونات ودش من الطشات علينا وانا طبعا اخدت اللى فيه النصيب وكأنها حماية العيد بالظبط ليا ولينا كلنا يعنى لكن ولا همنى كل ده , لاننى شوفت الناس اللى لسة بتحب البلد على حق وبتحب دينها الصحيح وفاهماه صح مش زى مالسياسة عايزة تشكله
وعلى فكرة كل اللى انا حكيته ده حصل فى مسيرة سلمية فاانا لا اتكلمت عن دماء او سيوفولا حفاظ على الشرعية بالدم ولا جهاد ولاغيره