الغلابة ملهومش مكان بيننا

من غير تفكير ولاتحضير ولا تجميل فى الكلام ولا حتى تزويقه او تنسيقه لان الموضوع مش مستحمل وبيوجع كل انسان عنده دم وبيحس باللى حواليه
كل يوم نسمع عن حاجة جديدة مش عارفيين ايه لازمتها اللى يقولى تطبيق شريعة واللى يقول حجب مواقع اباحية واللى يقولى مش عارف ايه
ارجوكم فكروا فى اللى عايشيين تحت الكبارى واللى نايميين عالرصفان واللى بيدوروا على اكل فى الزبالة وغيرهم كتيير, بالله عليكم يااللى بتفكروا فى الحاجات الغريبة دى وسايبين ناس زى دول من غير ماتوفرلوهم حياة كريمة نايميين ازاى وضميركم مستريح
هى مش الثورة قامت عشان دول اللى انتوا قفزتوا عليها زى الاسد الجعان اللى فضل جعان مدة كبيرة واول ماشاف فريسة جعلها هى هدفه الوحيد لحد مااقتنصها وحتى مش عارف يوزع منها حتة صغيرة للارنب الجعان اللى معاه فى نفس المكان 
يهم ايه واحد بياكل من الزبالة حجب المواقع الاباحية اللى هتكلف البلد 100 مليون جنيه عشان فى الاخر ننزل حتة برنامج بروكسى من عالنت ببلاش يفتح كل ده  طب متأكلوا الناس دى احسن ولا نسيتوا شعار الثورة " عيش وحرية وعدالة اجتماعية " فين الشعار ده دى ناس لا لاقية عيش الا اذا كان فى الزبالة ولا حرية الا اذا كانت فى العرى فقط من قلة الهدوم اللى بيلبسوها وطبعا بالنسبة للتعبيرعن مشاكلهم حتى فدى اصلا مفروغ منها ولو كان فى عدالة اجتماعية مكنوش هيبقوا موجودين اصلا دى ناس مدهوسة تحت خط الفقر بمراحل كتييرة جد ا ......
 يهم ايه فى الناس دى بتطبيق الشريعة الا لو كان ضمن تطبيق الشريعة ان مش هيبقى فى حد جعان فى البلد او هيخلى الناس الاغنيا تتكفل بااطفال زى دول
ولا جواز ال8 سنوات وهما بيغتصبوا بعض من غير رادع ولا وعى ولا اصلا فاهميين هما بيعملوا كدة ليه
 يهمهم فى ايه النقاب ولا الحجاب وهما مش لاقيين نص متر يغطيهم من قسوة البرد يهمهم فى ايه شرب الخمر وهما مش لاقين اصلا مية نضيفة او حتى معلقة دوا تخفف مرضهم ولا ابو تريكة ساب الاهلى او ماسابوش ولا محل عربيات عمل تخفيض النص ولا محل بدل عامل تخفيض الربع ولا قناة فضائية جديدة ولا اللى قفز من القمر ولا ايه بس ولا ايه !!.... دى ناس مش عايشة اصلا 
ارجوكم اهتموا بيهم دول اخواتنا وولادنا وامهاتنا ليه سايبينهم كدة وبنفكر فى السلطة واللى حوليين السلطة . جتكم الغم