قلبى انضف من المزود

من غير زعل .. من غبر عتاب ... من غير مشاكل . ومن غير اى حاجة وحشة تقف قدامنا وتعكننن علينا وتضييع فرحتنا بعيد ميلاد المسيح اللى بيجى اول اسبوع فى السنة علشان يفكرنا بأن ده كمان ميلاد جديد لينا
ميلاد جديد كل سنة ليسوع جوة قلوبنا وربنا هو اللى بيشتغل بعد كدة احنا كل اللى علينا بس اننا نفضى قلبنا من الكراهية والحقد والغضب اللى جواه وكل احساس شرير جوانا اللى بيجر وراه احاسيس اشر منه وتصرفات متليقش بينا ابدا , لكن مننساش ان ربنا لما جه يختار مكان لميلاده اللى هو اعظم شخص فى الكون اختار لنفسه مزود بقر مع انه كان قادر يختار لنفسه اعظم وافخر قصر فى العالم وكمان كان قادر ان كل ملوك الارض يعرفوا بميلاده ويحضروا ويجيبوا هدايا من اغلى وافخر كنوز الدنيا لكنه اختار المزود بالذات علشان يقولنا ان انا عايز اسكن قلبك اللى مش ممكن هيكون مهما بلغت قساوته ووحاشته اوحش من مزود البقر... لكن الفرق بين قلبك وبين المزود ان لما خبطت على باب المزود صاحبه فتحلى علشان كدة دخلته ... انت كمان لو خبطت على باب قلبك هتفتحلى ولا هتقولى مش فاضيلك او امشى دلوقتى وتعالى بعدين او مش مستعد دلوقت فى شوية حاجات عايز اتمتع بيها وبعد كدة تعالى 
لكن انا يارب مع بداية السنة الجديدة مستنيك تتولد جوايا زى مااتولدت فى مزود البقر وفاتحلك باب قلبى ومستنيك تدخل من غير استئذان , صحيح جوايا حاجات لسه بنفضها بس أدخل انت يارب ونضف معايا