كلاكسات

طول مانا ماشى فى الشارع والعربيات ورايا بيب بيب حاجة تقرف هو من حقهم يكلكسولنا كدة ستيين كلكس فى الثانية من 60 عربية مختلفة وكلكسها مختلف على حبة كلاكسات بتاعت موتسكيلات وساعات برضو يخش فى النص اصوات عربيات الكارو اذا كان اللى راكبها ولا صوت الحمار اللى جاررها ولا صحيح انا ليه زعلان ,  دول هما اللى المفروض يمشوا فى الشارع واحنا نمشى عالرصيف , بس ازاى نمشى عالرصيف , لا مش قصدى ان فى رصفان ارتفاعها نص متر الشباب نفسه ميقدرش ينزلها ولايطلعها   لكن قصدى ان المحلات فارشة الرصيف كله بضاعة  وباقى الرصيف مفروش بضاعة من غير محلات .
 طب ده حقهم ؟ اكيد لأ, طب ده حقنا اننا نمشى فى الشارع ومش عالرصيف اكيد لأ؟ , طب من حق العربيات تكلكس عمال على بطال ؟ اكيد لأ برضو
 امال نعمل ايه طيب عشان نترحم من صداع الكلاكسات ده وربنا يتوب علينا من اسبرين الصداع اللى بنسفه عمال على بطال ده
هو احنا ممكن نساعد بعض لو كل واحد يجى على نفسه حبة نونوخالص ..
 العربيات تكلكس فى اضيق الحدود والمحلات تستغل الرصيف فى اضيق الحدود والناس اللى ماشية على رجليها تمشى عالرصيف اما تجيلها الفرصة ولو ان المشى على الرصيف ده بقى فرصة مستحيلة زى فرصة التوظيف كدة بالظبط وحتى لو مشيوا فى الشارع يكونوا مصحصحين شوية للعربيات وبلاش يعملوا نفسهم من بنها كدة مع انى والله انا اجدع واحد يعمل نفسه من بنها