متبقاش روتينى

أصحى الصبح أشرب القهوة مظبوط ومظبوط جدا كمان وأروح الشغل من نفس السكة وبنفس المواصلة وأكيد لو كان معايا عربية كنت هاحب أركن في نفس المكان بتاع كل يوم واشتغل نفس الشغل..
وحتى أما أطلع أجيب سندوتشات في البريك بتكون من نفس الراجل اللى هو أصلا بيبيع نفس الحاجات وأخلص في نفس المعاد وأروح بنفس الطريقة وأروح آكل وأخد حمامي وأتفرج عالتلفزيون اللي بيجيب نفس الأفلام والمسلسلات والإعلانات أو حتى الأخبار الكئيبة اللى شبه بعض..
ولو مكنش تلفزيون يبقى فيس بوك بتعليقاته بصوره بناسه ولو لسه فيا الرمق شوية أروح نازل على الكافيه وأشوف نفس الناس وأشرب نفس المشاريب أوووووف…. حاجة تطهأ.
روتين
روتين ياعم ليه حابس نفسك فيه من غير ما تجدد ؟ ماتعمل كل اللي نفسك فيه ومتقولش قيود ومتقولش اتعودت, متستسهلش متقولش كسلان ….. طب اسكت شوية بقى..
أنا مبقولكوش انتوا أنا باكلم نفسي أصل أنا مريض بداء الروتين ده بس لازم نفكر سوا نتغير إزاي..
فيها إيه لو بدل القهوة المظبوط تخليها سادة ولا حتى زيادة ولا أقولك نغيرها خالص ونشرب عصير ايه المشكلة يعني ونروح الشغل من سكة تانية مختلفة حتى لو صحينا بدرى عشر دقايق ولا روحناه مشى ولا حتى بعجلة !! وإيه رأيكم لو غيرنا طريقة عملنا ونعمل شغلنا بطريقة محتلفة أهو نجرب يمكن نكون مبسوطيين وممكن تكون أنجح من اللي متبعنها اللي هي أصلا تقليد للي قبلنا..
حتى لو نزلنا شوية بالليل مش شرط يكون كافيه ونشرب كابتشينو كل يوم ممكن نزل على قهوة بلدي ونشرب شاي بالنعناع ولا حتى سحلب..
ولو كلاسيك مبقاش ولو كنت كاجوال مااجرب الكلاسيك :)
طب مانجرب بدل الفيس والتلفزيون ما نقرأ كتاب أي كتاب إن شالله لو مجلة ميكي أكيد هيفرق معانا في حاجة، أو نكتب أي حاجة برضو ان شالله لو خواطرنا ولا نتعلم آلة موسيقية يمكن نلاقي فيها فرحتنا..
إحنا بني آدمين مش طوب عشان نحط نفسنا في قالب هو اللي يشكل شخصيتنا.. إحنا أحرار ياجدعان.
فك قيودك بنفسك وحرر نفسك التغيير بإيدك إنت مش بإيد حد تاني ولا بإرادة حد تاني 
ومتنساش ان التغير فى حد ذاته متعة ...