كافر ولا مش كافر !

فى واحد انتحر من من كام يوم عشان مش قادر يكفى بيته وعيلته من طلبات وكان منتحر واحد من شهر شانق نفسه على لوحة اعلانات
علشان يقول للناس كلها انا بضحى بنفسى اهو قدام عينكم اللى بتبص على اعلانات حاجات تشتريها ومحدش بيقدر البنى أدم فيكم واليوميين الجايين هنسمع عن التالت والرابع والخامس للأسف
لحظة من فضلك : بعيدا عن حكمنا عليهم او ادانتهم او نسئل ده كافر ولا لأ او ده مات مؤمن ولا لا .. وياترى رايح فين الجنة ولا النار ولا بين البينيين .. فاده فى النهاية مش حكمنا ولا لينا دخل فيه الا الدعاء ليه بالرحمة فقط
 كل الناس اتكلمت عن الموضوع وقبل كدة كمان اتكلموا بس انا عندى وجهة نظر بعيدة شوية فى الموضوع ده ممكن ميكونش حد اتطرقلها ومكن محدش برضو يبصلها
هو اللى انتحر ده عشان بياخد 1200 جنيه ومسئولة من اسرة سايبهم وشغال طول اليوموأخر الليل يروح فى سكن مغتربيين شبه الزنازين كدة عشان يحاول يأكلهم فى ظروف الغلا اللى بتحصل كل يوم وسط وعود وانفلات اسعار جنونى من غير اى زيادات فى المرتبات والاجور بتقابلها !!
40 جنيه فى اليوم على 3 أشخاص او 4 يكفوا ايه ولا ايه
طب هو واخد حقه فى الشغل ؟؟؟
الحقيقة الراجل ده كان شغال فى مصنع محترم جدا بيعمل مبيعات بالملايين بس طبعا صاحبه كأى رجل اعمال فى البلد الحلوة دى يروح يخسف بحق عماله الارض على انهم عبيد وغصب عن أبوهم هايفضلوا عبيد عنده لأنهم مش لاقيين شغل غيره يبقى ليه يقبضهم عدل ! ولا ليه يديهم نسبة من الارباح ! ولا ليه حتى يشتغلوا كويس ماهم شغاليين على أد فلوسهم والى يقصر يتخصمله ماهو لازم يطفح الكوتة بالمليميين الى بياخدهم دول ..
لكن على الجانب الاخر بقى رجال الاعمال دول هما التدين كله , يدفعوا احلى تبرعات وزكاة مال او عشور للكنيسة .. رجل الاعمال من دول يدفع أد كد عشان يجيبوا تكييفات لكنيسة ولا ترميمات ولا غيره ولا غيره أو حتى يديهم لأب كاهن حبيبه يقسمهم بطريقته وطبعا رجال الاعمال دول ساكنيين فى احسن مناطق الى تابعه ليها افخم كنايس اللى برضو اللى بيصلوا فيها من علية القوم اللى هما مش محتاجيين اصلا , او يجمع رجل الاعمال من دول زكاة الاموال لشيخ حبيبه برضو او فى الجوامع الفخمة وللجمعيات الخيرية بتاعة اصحابه او نوادى الروتارى وخلافه ده غير موائد الرحمن بتاعة علية القوم لزوم الفشخرة والوجاهة الاجتماعية 
لكن دول يدوا الغلبان حقه فى الشغل لااااااا 
مع ان العشور او الزكاه كدة كدة بتدفع انت هتدفع على ربحك الكبير او هتزود مرتبات الغلابة اللى معاك هيدفعوا برضو من مرتباتهم هيبقى نفس النتيجة ده لو انت فعلا عايز تدى ربنا حقه ! فى الحالتين ربنا اصلا مش مستنى فلوسك ولا حتى مليم واحد منك هو بس قالنا ندفع عشورنا وزكاتنا كدليل للحب واثبات مننا ليه اننا بنشكره على الفلوس اللى باعتهالنا فى الاساس , وكلام فى سرك ممكن العمال والموظفيين الغلابة يكونوا بيدوا ربنا حقه اكتر منك او مبينسوش حقه زييك اللى انت اختزلته فى حبة فلوس بيتهيئلك بيها انك بتشترى رضا ربنا وانت فى الحقيقة مش قادر تعدل بين موظفينك ومخلى يوم ورا التانى حد يقع منهم ويشرد اسرة بحالها لأنه كرامته مش جايباه يشحت ولا عرف يبقى رجل غنى زييك 
فى الأخر لو احنا اللى بنكفر او نسامح أكيد طبعا كنا هانكفر اصحاب الاعمال دى مش الغلابة المفروميين تحت أيديهم :(
" الغلطة غلطة مجتمع وغلطة سوء عدالة التوزيع فى الدولة وغلطة رجال الدين فى التوعية " وحسبى الله ونعم الوكيل