رسالة شكر للريس

انا فكرت الصراحة اكتب شعر عنك بس معرفش اكتب شعر فقولت اهو اخبط شوبة فى الكتابة يمكن يوصل لك اعتزازى بيك
انا بشكرك يارييس جدا ان بتحرص دايما ان ميكونش معاك حرس وطبعا اقصد فى الشارع عادى مش فى الجامع بس يعنى ,  ودايما عايز تشارك فى كل حاجة بنفسك وتزور الفلاحين فى بيوتهم وتاكل وتشرب معاهم ومتخافش من البلهارسيا مانت عارف ان كله مقدر ومكتوب لأنك مؤمن مع انك من غير دقن يارييس
وكمان بنشكرك انك كنت عايز تشوف الناس على حقيقتهم فى الشارع وتركب تاكسى زيينا والمفاجأة الكبرى بجد لما ركبت الاتوبيس
وكمان تحية انك شيلت وزير التموين عشان مبيدعمش الغلابة اللى بجد ولا بيوصل الدعم لمستحقيه فعلا مش مجرد مصطلح على ورق وبس
ومننساش طبعا موقفك اما جيبت الوزير وزنقته وعملت عليه حفلة تريقة قدام باقى الوزرا وجيبتلهم فول بدودو من اللى احنا بناكله طول النهارده وكمان جيبتلهم عيش محروق من ابو مساميراللى معدتنا بتطحن فيه ومبتقولش بم وحتى ان قالت بم الصراحة مقدمناش غيره ,,, ماعلينا ماعلينا   
تسلم ايدك ويسلم عقلك ياشيخ انك بتعرف رأى الناس الغلابة فيك وفى وزارتك من خلال الشغاليين اللى حواليك مش من خلال شوية تقارير مكتوبة باافخم الاقلام ولكنها تخفى داخلها الكثير من الالام 
شكرا يارييس انك ترحب بالمعارضة ولا تكمم الافواه والاجمل من كدة انك بتستفاد منه فعلا
حقا خالد زكى ادى دور رئيس الجمهورية كما يجب ان يكون فنحن نفتخر برئيس مثل هذا ولكننا لم نراه الا فى السينما فقط حتى الان .....