المخ اشتكى

زى مالألة محتاجة وقت نفصلها فيه عشان الموتور بتاعها ميسخنش وبالتالى تعطل الالة كلها وهنتعطل عليها كذا يوم , وكمان العربية محتاجين نسيبها تبرد شوية لو كنا بيها فى مشوار طويل عشان متقطعش " على حد علمى يعنى انا مليش فى ميكانيكا السيارات اوى" والتلاجة برضو لازم نفصلها كل مدة عشان الموتورميسخنش والكمبيوتر لو شغلناه فترة كبيرة بيهنج ويقرفنا معاه ...... الخ
احنا البنى ادمين بقى ملناش حق نفصل موتورنا شوية اللى هو اهم موتور فى كل الامثال السابقى دة ولا احنا مستنيين نهنج ؟!
من اول نصحى هنفطر ايه وهنفطر عيالنا ايه وهنلبس ايه وهنلبس عيالنا ايه وهنروح الشغل ازاى وهنعمل ايه ونفكر واحنا فى بنشتغل وكلام وتليفونات ومشاوير ونفكر فى المستقبل وبكرة والغدا والعشا والمواصلات والزحمة والمصاريف والفصال .... 
وكمان نرووح نشغل دماغنا بالسياسة طبعا انا بتكلم على فقة الناس المهتمة بالاخبار اللى بتمسك الجرنال والنت من الصبح وهاتك ياتحليل وبعد كدة نكمل على تقارير اخبارية اما نرووح ونختم بالتوك شواللى اصبح مصدر ثقافة معظم المصريين الى ان نصبح على فجر جديد بااخبار جديدة بتقارير جديدة ومشاكل جديدة وهاتك ياوجع دماغ وأكننا هنخاف على التلاجة ولا العربية اكتر مننا شخصيا
ماحنا كمان محتاجين نفصل وألا ماكنوش احيوا رياضة قديمة تهتم بيها الكثير من الدول وهى " اليوجا " التى تعتمد على صفاء الذهن لجعله اكثر نشاطا واستيقاظا وجعل الانسان متفائل ومحب للحياه دائما , ولا كان علماء النفس واطباءه ينصحون على مر العصوراى شخص بتدوين جميع مايتعلق بذهنه فى ورقة قبل النوم "وده من رأيى اهم فايدة بالنسبة لى فى اختراع المدونات هذه " ليكن ذهنه صافيا ونومه عميقا ولا كان اجدادنا نصحونا بالنظر الى المشكلة من بعيد لتهيئة عقلنا على اخذ حلول منطقية محايدة
انت حتى طول مادماغك كدة مش هتعرف تبدع فى حياتك لا فى شغل ولا حتى لو عندك ملكة شعرية هتعرف تكتب ولا حتى هتعرف ترسم لوحة لأن انت دماغك اصلا بتكون عبارة عن لوحة كلها شخبطة
مبقولكش متفكرش فى كل الحاجات المهمة فى حياتك لآ فكر بس مش بشكل مرضى ومتنساش ان ربنا بيعمل اللى شايفه مناسب ليك مش اللى انت شايفه مهما خطتله ودبرلتله ومبقولكش متتابعش اخبار لا تابع بس برضو مش بشكل مرضى ولا شكل مبالغ فيه لكن صفى دماغك ...
    اسمع موسيقى هادية فهى ليها مفعول السحر على صفاء ذهنك وترتيب افكارك والنوم العميق ومنه هتصحى الصبح فايق وهتفكر فى مشاكلك بشكل اهدى ودون توتر ودون اكتئاب وياسلام ياسلام لو تتعلم عزف اله موسيقية سهلة زى الجيتار ولا العود ولا الكمانجة لان الالات الوترية بالذات دى مهمتها
   اقرا كتاب جميل او قصة ,  مفيهاش مانع ابدا لو قريت قصة خيال علمى او حتى قصة ميكى ماوس فااهم حاجة انك تستمع وتخلى مخك هو كمان يريح ويستمتع
   اتفرج على فيلم كوميدى من بتاعة زمان دى اللى فيها الضحك من القلب مش مصطنع او معتمد على قلة الادب عشان تضحك ومفهاش حاجة خالص على فكرة لو اتفرجتلك على كارتون ولا ماتش كورة ولا حتى تنس 
   العب لعبة بتحبها فى نادى ولا حتى على الكمبيوتر 
ادينى قولتلك وانت وقرارك بقى
انا عن نفسى قررت اكتب الموضوع ده فى عز معمعة الحراك السياسى اللى احنا فيه ده بعد اما حسيت ان خلاص دماغى هنجت .... لا عارف افكر ولا عارف اكتب ولا عارف انام ولا حتى عارف اضحك
فقررت ادى لمخى اجازة يومين وبعد كدة هخلى بالى اوى منها , مش أعز عليا من التلاجة هيا ...