كشف حساب

كل سنة وانتم طيبيين واللى مستنى فيكم يعرف مين شخصية العام السنة دى او حظه للعام القادم او خط سير الكواكب وطريق الابراج , يبقى ممكن تسئل نفسك كام سؤال كدة عالماشى لو جاوبت عليهم يبقى كمل مسيرتك فى الاتجاه الغريب ده والله يباركلك وان شاء الله مسيرك هتصدق ان فى حاجة اسمها خطة ماشى عليها وواقع انت رسمته لنفسك .. ولو لقيت انى معايا حق فى كلامى ومش عارف تجاوب على السؤالين تلاتة اللى جايين دول يبقى لازم تعمل حاجة مهمة اوى فى حياتك كل اخر سنة وهى كشف حساب :)
انت عارف انت برج أيه فى كل بلاد العالم او معظمها او حتى بلدين منها بس ؟
انت عارف انت ليه البرج ده واتسمى كدة ليه وبيرمز لأيه ؟
هو انت لسه بتؤمن بالحظ وان الواقع هو اللى بشكلنا مش احنا اللى بنخلق الواقع ؟
انت لسه بتؤمن بالحظ والنصيب ومتعرفش ان فى حاجة اسمها اجتهاد !!
انت لسه مستنى ناس تمشيك ورا كلامها وميبقاش صوتك من دماغك ومن تجارب اللى سبوقك وخبراتهم ؟
انت فاكر اصلا مين شخصية السنة اللى فاتت واللى قبلها عشان تستنى شخصية السنة دى ؟
لو انت شايف ان كلامى صح يبقى كمل قراية , ولو مش شايف ومش عايز تكمل يبقى كتر خيرك ونشوفك على خير فى المقال الجاى ان شاء الله ...
محتاجين نعمل كشف حساب فى كل اتجاه فى حياتنا
احنا مين وواقفين فين دلوقتى ورايحيين على فين ؟ وهل انت ماشى فى الطريق اللى بدأتو قبل كدة وشايف انك متقدم عن النقطة اللى كنت فيها السنة اللى فاتت واللى قبلها واللى قبلها ؟ ولا انت توهت فى خط سيرك ولا رسمت ليك خط تانى , ولا لسه خطك مرسوم بالقلم الرصاص مش عارف تثبته ! ولا لساك ماسك القلم وصفحتك فاضية  مش عارف ترسم أيه ؟ او جايز انت لسه مش عارف انت مين وفين وليه ومستنى الفرصة ؟؟ كل ده جايز بس بالنسبة للفرصة فاأحنا اللى بنحاول نخلقها مش دايما هى اللى هتجيلنا لحد عندنا
هل بتتقدم فى شغلك ؟ بتكتسب خبرات جديدة وبتتعلم حاجات جديدة ! شايف نفسك لسه عندك اكتر وقادر تدى وعايز تنمى نفسك فى نفسك المجال اكتر واكتر ؟ ولا انت مش حابب اللى بتعمله زى تلات تربع المصريين وبتقضى يومك وخلاص من غير متعة ولا خبرة ولا مكسب كسبته فى الحياة !! غير انك بتجييب فلوس يادوب تكفيك عشان يوم يسلم يوم ويسلم يوم وتخلص الايام على كدة ؟
أوعى تكون انت من اللى المكسب بتاعه ونجاحه بيحسبه بالفلوس اللى فى البنك ولا فى القرشين اللى شايلهم تحت البلاطة .. ده بالعكسب المكسب المادى ده اقل مكسب انت ممكن تكسبه فى حياتك , لانك لو بتحسبها كدة فانت لو خسرته لاى سبب او اضطريت تضحى بجزء كبير منه مقابل تشترى لنفسك شقة ولا عربية ولا مشروع وخسرولا راح فى اى ظرف فانت هتحس اد ايه انك محبط وولا حاجة قدام نفسك 
فاشكر ربنا على اللى معاك ومتخليش ده هدفك ..
ولا هتقولى اشكر ربنا على ايه وفى احسن منى كتير اوى اوى 
هاقولك فعلا انت معاك حق , الشكر ده حاجة صعبه خاصة لو المفروض تكون بتشكر برضا بس صدقنى لو حسبتها بالمشقلب وتفتكر اللى عندك مش اللى معندكش هتعرف ترضى فكفاية ان عندك ( اب وام او عيلة او اخوات او صحة كويسة وايدين ورجلين وعينين بتشوف وقلب بيدق وشغل وبيت ساكن فيه وأكل بتاكله وهدوم ساتراك  و ........... ) مش هتبطل شكرلأن فى كتير اوى معندوش الحاجات دى
بمناسبة كلامى ده انت محتاج برضو تعمل كشف حساب لنفسك فى مسيرتك مع ربنا واتجاهك رايح ليه ولا ماشى عكسه , شايف نفسك روحيا احسن من السنة اللى فاتت ولا السنة اللى فاتت هيا كانت الاحسن ؟ وشايف لو كملت كدة مع ربنا هتكسب ولا هتخسر ؟؟
انت عامل كشف حساب للياقتك البدنية ؟ ولا غريبة الحكاية دى :) .. انت شايف انك بقيت قادر تمشى زى الاول طب بتجرى , بتركب عجل , بتعمل اى رياضة تحافظ بيها على صحتك ولا مبلط فى الخط ومقضيها أكل وشرب وأنتخة ونوم ؟؟
ليك موهبة !! وبتنميها ؟ قراية , كتابة , عزف , رسم كسبت لغة جديدة , نميت لغة قديمة حتى !! او اى حاجة تانية تقدر تحس بيها بالنجاح مع نجاحاتك التانية عشانت يبقى عندك حاجة تكمل حاجة ونجاح يرفع فشل وهكذا ؟؟
ممكن تعمل أكتر من كشف حساب ولأهداف كتيرة اوى فى حياتك , بس لازم تعمله وتمشى عليه وطول وقتك باصصله عشان طول مانت عندك خطة او جدول زمنى حاكمك بوقت هاتحاول تنجز اى حاجة منه عشان تبقى راضى على نفسك على الأقل
لازم تعمل كدة والخطواط المكتوبة هتفتكرها وتتعلم منها دايما اكتر من الانصاف افكار اللى بتجيلنا وتتوه مننا جوه الدماغ
أعمله بطريقتك ومش هتندم هتحس بالفرق لو مكنش فى تقدم ملحوظ فى حياتك على الاقل هايبقى فى استمتاع بوقتك 
سلام