365 يوم

المكان :   أوضة نومك
التوقيق :  الخامسة فجرا 
الحالة  :  متوتر جدا وضربات قلبك سريعة
السبب  :  رؤية او كابوس على حد تعبيرك بتوصل لك رسالة ان ربنا جاى ياخد روحك بعد 365 يوم بالظبط .. سنة بالتمام والكمال
مممممممم
ياترى هاتعمل ايه فى ال 365 يوم دول , هاتستعد من اول دقيقة ؟ ولا من اول شهر ولا من تانى شهر ولااااا على أخر دقيقة !!
الصراحة ده سؤال نهايته مفتوحة كل واحد يتخيل لنفسه اجابة بس المهم تكون اجابة صادقة مع نفسه لأن محدش هايسمعها غيره هو ولا هاتنفع حد غيره هو .... فمش محتاجة أجابة عالملأ 
ومتنساش ان العذارى الجاهلات كانوا هما كمان سهرانيين وكمان معاهم مصابيح يعنى مستعديين لكن مكنوش مستعديين كفاية عشان كدة زيتهم خلص , تخيل انت بقى ربنا مديك المصباح وكمان المعاد وبيقولك يلا يابطل بقى شد حيلك وأملاه زيت يكفيك .. فالوصايا محفوظة والتعاليم معروفة والكتاب موجود " بس نضفه من التراب اللى عليه الاول " :)
طب هل هتتوب ونحس فعلا ان مبقاش عندنا وقت نضييعه ؟؟
ولا بمناسبة الوقت اللى بيضيع فمحتاجيين نستغله برضو شوية فى حبة فسح على سهرات على فيس ممممممم
وبمناسبة الفيس برضو , طب هنقضيها شات لوش الصبح كل يوم نتكلم فى اى كلام وعن اى حاجة ولا هنستغل وقت بأيجابية !!
ياسلام بقى بدل جيبنا سيرة الوقت وانه قرب يخلص كدة يبقى نستغله بقى ونطحن نفسنا فى الشغل وننسى الدنيا باللى فيها المهم بس الفلوس ؟ بس الفلوس ليه وعلشان ميين وهاعمل بيها ايه ماهى كلها 365 يوم بس !
ممكن نعمل كدة ! مع ان فى حاجات ايجابية كتيير تتعمل .. نساعد بعض نحب بعض وندى المحتاج ومنتكلمش على بعض " مع انها واسعة شوية منتكلمش على بعض دى " لكن نحاول ماهى كلها سنة 
بس عايز اقولك حاجة وأقولها لنفسى قبليك
الحياة أقصر من كدة بكتيير وممكن نعتبرها سنة واحدة بس , ماهى مهما طالت قصيرة ومفيش اسرع من الايام وسنة ورا سنة بتجر سنة وفى الأخر مطالبيين بحساب وكالتنا فى شوية الأيام االى قعدناهم دول 
ولا حتى حد عارف عايش سنة ولا أقل من سنة ماهى لابمنطق ولا بعقل ولا بعمر ولا فيها لحظة زايدة .... ولا لحظة ناقصة 
المهم بس نكون مستعديين فى كل لحظة .....