عيد العمال

 طول سنين الدراسة نعرف ان عيد العمال اجازة ووقتها كنت بفكر بقى ان العامل بيبقى مبسوط اليوم ده على اساس انه تكريم ليه والمجتمع كله بيفتكر ان العمال دى فئة عايشة معانا ولولاها الانتاج يقف والاراضى تبور والماكينات تتعطل والعجلة تبطل لف و ....
واشتغلت اول شغلانة فى حياتى كانت محاسب موقع وكل شغلى مع العمال وعرفت يعنى ايه ناس مطحونة فى الحياة علشان تاكل بس هما والملزوميين منهم ,  ويوم 30 ابريل بقولوهم كل سنة وانتم طيبيين قالولى وانت طيب بس ليه قولتلهم بكرة عيد العمال قالولى اه صح عندك حق اهو يوم زى اى يوم وأنت طيب
قولتلهم احنا بكرة اجازة ان شاء الله
كان سؤال نفسى اى حد فى الموقع يجاوبنى عليه بااه عشان اريح انا كمان معاهم لو اجازة هأنتخ ومش هاجى مع انى مبتعبش ربعهم
لكن ياريت ردوا عليا بااه او لا دول ردوا عليا باسلوب توسل !!
حرام عليك يااستاذنا انت عايز تقطع رزقنا ورزق عيالنا ليه بكرة شغل ولو عايز تسهرنا كمان نسهروا مفيش مشكلة داحنا راس مال فى دراعنا وساعة مانتعب خلاص كدة هنتشرد
على اد مااتصدمت من ان بكرة شغل اتصدمت اكتر من الفئة دى اللى قوتها فى يومها واليوم اللى تأجز فيه ممكن تشحت فيه درجة حرارة توصل للانصهار يشتغل , ثلج ومطر يشتغل , دراع مكسور رجل متجبسة ... ماقوداموش غير يشتغل برضو والدولة عاملة عيد عمال وعيد بطيخ وهى لا حامية حقهم ولا منظمة عملهم ولا الهوااااا حتى
لو تعب ميلاقيش علاج ولو أجز يتخصمله ولو مشروع خلص او عايزيين يستغنوا عنه يرموه فى الشارع ولو عايزيين يطفشوه بيطفشوه فهو مجرد كورة يشوطوها فى الملعب اللى يختاروه والعمال للاسف راضيين ماهو المهم يكملوا لعب بدل مايتركنوا عالدكة او يفضلوا باقى حياتهم فى الكورنر
من الاخر كدة عيد العمال ده كل فئات الشعب بتحس بيه الا العمال 

تعليقات

المشاركات الشائعة من هذه المدونة

الفتور الروحى

الطفاسة

يوسف الصديق