انا حر

عمرك جربت قبل كدة تخرج عن نطاق اصدقاؤك وتخرج وسط ناس جديدة متعرفش منهم ولا حد علشان تعرف هما بيفكروا ازاي او عايشيين ازاى ..جايز تتعلم منهم طريقة تفكير مختلفة او تشوف فيهم نهاية سكة تفكير ماشي فيها وترجع عنها بدل ماتكملها تجربة جميلة صدقني لو مافادتكش فهي مش هاتضرك. انا عن نفسي باحاول اعملها من وقت للتاني علشان زى ماتقول كدة أعمل شوبينج للأفكار الجديدة وأعرف برضو أفكارى عالموضة ولا لأ المهم عايز اشرككم معايا في موقفين صغيريين حصلولي في يوم واحد أتعلمت منهم كتير في يوم كدة أخدت بعضي بعد صلاة الضهر ونزلت علي منطقة شعبية كدة لاداعي لذكر أسمها وقعدت علي قهوة متواضعة مع شوية ناس حلوة معرفهاش ، طلبت قهوتي وقعدت العب دومينو وسط ناس مقضية كل حياتهم في لعب دومينو شوية وطاولة وشوية وأحيانا كوتشينة أو وقت المتشات يبقوا انتباه هياكلوا التلفزيون بعينيهم .. اللي شغال منهم أرزقي اليوم بيومه واللي علي باب الله واللي موظف حكومة ومزوغ من شغله او الي منهم عالمعاش فالاشكال مختلفة والمستويات التعليمية والمادية مختلفة برضو ، لكنهم مجتمعيين علي حاجة واحدة بس هي سياق الحديث فكل واحد منهم بيتحدث عن ماضي...