انا حر

التيتى للبلياردو ده اسم معروف لناس كتيير اوى اوى اوى من الاسكندرانية او اللى بيمشى على طريق مصر اسكندرية كله , لكن مفيش مانع برضو اعرف بيه الناس اللى مش عارفاه التيتى للبلياردو ده يااخوانة طبعا باين من اسمه انه محل بيجهز ترابيزات البلياردو فى اسكندرية وكل الناس تعرف الاسم لكن تقريبا محدش يعرف المكان فين اصلا المهم التيتى ده ياجدعان كاتب اسمه على كل حيطان اسكندرية وتحت كل كباريها وفى كل مواقف المشاريع وتقريبا كدة بين الاعلان والتانى مفيش نص متر لكن احنا بنقرا وادينا ساكتيين وملناش دعوة اهو صحيح تلوث بصرى بس اتعوودنا عليه لكن بقى اما يمسحوا كل الجرافيتى اللى عالحيطان اللى هو رسومات مرسومة او مطبوعة على الحيطة بطرق جمالية معينة بتعبر عن الثورة وشهداء ااثورة ويقولوا عشان نضافة الشوارع مع انها شكل حلو والله والناس بتحب تتصور جنبها , ويسيبولنا اعلانات تانية ملهاش اى لازمة الا لصاحبها بس ومكتوبة على الحيطة مش على ملصقات حتى بغض النظر عن ايه محتوى الاعلان اللى هو مش دوا ولا اكل حتى ممكن فئة كبيرة تستفاد منه , ده بقى يبقى اسمه ايه ؟ عايز تشيل شيل كله يااما تسيب كله وانا لو عليا اش

طول مانا ماشى فى الشارع والعربيات ورايا بيب بيب حاجة تقرف هو من حقهم يكلكسولنا كدة ستيين كلكس فى الثانية من 60 عربية مختلفة وكلكسها مختلف على حبة كلاكسات بتاعت موتسكيلات وساعات برضو يخش فى النص اصوات عربيات الكارو اذا كان اللى راكبها ولا صوت الحمار اللى جاررها ولا صحيح انا ليه زعلان ,  دول هما اللى المفروض يمشوا فى الشارع واحنا نمشى عالرصيف , بس ازاى نمشى عالرصيف , لا مش قصدى ان فى رصفان ارتفاعها نص متر الشباب نفسه ميقدرش ينزلها ولايطلعها   لكن قصدى ان المحلات فارشة الرصيف كله بضاعة  وباقى الرصيف مفروش بضاعة من غير محلات .  طب ده حقهم ؟ اكيد لأ, طب ده حقنا اننا نمشى فى الشارع ومش عالرصيف اكيد لأ؟ , طب من حق العربيات تكلكس عمال على بطال ؟ اكيد لأ برضو  امال نعمل ايه طيب عشان نترحم من صداع الكلاكسات ده وربنا يتوب علينا من اسبرين الصداع اللى بنسفه عمال على بطال ده هو احنا ممكن نساعد بعض لو كل واحد يجى على نفسه حبة نونوخالص ..  العربيات تكلكس فى اضيق الحدود والمحلات تستغل الرصيف فى اضيق الحدود والناس اللى ماشية على رجليها تمشى عالرصيف اما تجيلها الفرصة ولو ان المشى على الرصيف ده بقى ف

ساعت عيل ظريف كدة يستظرف على حبة عيال فى المدرسة و يشوف اى تصرف يتعمله العيال دول بشكل مضحك ماهو ظريف بقى فمثلا عيل من العيال دى يكون بيجرى بسرعة وفجاة هوب اتكفى على وشه فيجى صاحبنا ده يضحك عليه وممكن واحد تانى يصعب عليه وعلى فكرة برضو اللى صعب عليه الواد ده مش شرط يكون رخم , وجهة النظر احنا بنشوف الحاجة ازاى بسخرية , بتفاوؤل , بااكتئاب , بنفاق .. كل واحد على حسب فممكن عمنا مرسى يكون بيعمل تصرفات كتيير ناس تشوفها مضحكة وناس تانية تشوفها تصرفات رئيس جديد لسه تحت التمرين وناس تقول فى أمل وناس تانية تقول أمل دى تبقى خالتك , لكن خلى بالك برضو زى ماانت بتشوف كدة فى ناس تانية كتيييييييييييير هاتشوف اى تصرف صغير اوى اوى حتى لو كان قد الفسفوسة انه انجاز عظيم وهما دول اللى بيطبلوله فازى ماانت بتسخر من ولاحاجة والناس بتقول عليك هايف فى كمان ناس بتطبل من ولا حاجة والناس بتقول عليها منافقيين .. زتونة الموضوع  احنا نخلى بالنا كويس ونتعلم نوزن الأمور بميزان وسط لا نكون من اللى بيسخروا اوى ولا كمان نكون من اللى بيطبلوا اوى

بين كل عركة والتاينة مش حرف الواو للاسف لكن بين العركة والتانية عركة او على الاقل مشادة , احنا ليه مبقناش طايقيين بعض ولا مستحمليين بعض ,, ده الغريب كمان ان الناس بتتلم فى العركة مش عشان تسلك ده عشان تتعلم ازاى تبقى بجحة وتتعلم لها كام شتيمة من اللى بيترصوا ورا بعض بسرعة دول ..  فيين اخلاق زمان زى ماكنا بنشوف فى الافلام الابيض واسود الرجالة بيحترموا السيدات والاطفال بيحترموا الكبار , هى دى نتيجة للعولمة ولا الاهالى مبقتش عارفة تربى  هى طبعا مش من العولمة لان العولمة دى غزت العالم كله ولسه البلاد دى بخير لكن انا بقول ان الاهالى مبقتش فاضية تربى كله مشغول بلقمة عيشه ولو عنده وقت فاضى بيشتغله برضو فى شغلانة تانية ماهو مطحون ومش مكفى , طب بما انه مطحون فبرضو يبقى خلقه ضيق ومش طايق نفسه وليه حق يتعارك عمال على بطال  انا صراحة التمستلهم العذر وهانزل اتعارك زييهنم لآن انا واحد منهم " يالا ياض ياابن التيت من هنا "

أصحى الصبح أشرب القهوة مظبوط ومظبوط جدا كمان وأروح الشغل من نفس السكة وبنفس المواصلة وأكيد لو كان معايا عربية كنت هاحب أركن في نفس المكان بتاع كل يوم واشتغل نفس الشغل.. وحتى أما أطلع أجيب سندوتشات في البريك بتكون من نفس الراجل اللى هو أصلا بيبيع نفس الحاجات وأخلص في نفس المعاد وأروح بنفس الطريقة وأروح آكل وأخد حمامي وأتفرج عالتلفزيون اللي بيجيب نفس الأفلام والمسلسلات والإعلانات أو حتى الأخبار الكئيبة اللى شبه بعض.. ولو مكنش تلفزيون يبقى فيس بوك بتعليقاته بصوره بناسه ولو لسه فيا الرمق شوية أروح نازل على الكافيه وأشوف نفس الناس وأشرب نفس المشاريب أوووووف…. حاجة تطهأ. روتين روتين ياعم ليه حابس نفسك فيه من غير ما تجدد ؟ ماتعمل كل اللي نفسك فيه ومتقولش قيود ومتقولش اتعودت, متستسهلش متقولش كسلان ….. طب اسكت شوية بقى.. أنا مبقولكوش انتوا أنا باكلم نفسي أصل أنا مريض بداء الروتين ده بس لازم نفكر سوا نتغير إزاي.. فيها إيه لو بدل القهوة المظبوط تخليها سادة ولا حتى زيادة ولا أقولك نغيرها خالص ونشرب عصير ايه المشكلة يعني ونروح الشغل من سكة تانية مختلفة حتى لو صحينا بدرى عشر دقايق

3 2 1 اكشن ببدا اول مدوونة كلاكيت اول مرة لكن مش اول مرة فى الكتابة ممكن نعتبرها كلاكيت 1000 مرة بس الكلام فى المدونة يبقى اجدع وليه طعم تانى شبه الاكل اللى بالسمنة الفلاحى مش اللى بالزيت ولا النباتي انت حر فيما لاتضر كلمة كتيير سمعتها وكنتش عارف انفذها فيين عشان كدة اخترت اعمل مدونة عشان اكتب الى انا عايزه من غير ما اضر حد  فانا هنا هاكتب اللى يجى فى دماغي واللى يخطر على بالى لا هارتبط بقيود ولا هارتبط بقواعد لغة ونخلى اهل العلم للعمل واهل المدونات للمدونات كتبنا وطبعا اللي مبيعحبوش كلامي بيقفل مدوونتى فاانا مش هاضره واوعدكم انكم لا هتلاقوا شتايم ولا هتلاقوا وقاحة على قد مااقدر ان شاء الله فعايزين كدة نبدا مع بعض بداية عسل عشان تكون ايامنا الجاية بيضة مع بعض  سلاموز